Qi sem
Far Lombard l'è un'associazion cultural qe la se ocupa de la promozion e de la revitalizazion de la lengua lombarda.
Fondada ofiçalment el 18 otover 2017, l'era jamò ativa del 2010.
L'Associazion la promœv la lengua lombarda come istrument normal de comunegazion soraprovinçal in tuts i ambets, soratut qei indove incœ l'è esclusa o asquas esclusa, compagn de l'informazion jornalistega, l'istruzion, l'aministrazion, la prœsa scientifega e leteraria.
Qest perqè l'usaj normal, quotidian e condivis del lombard scrivud l'è vun dei faitor fondamentai qe inzigen a parlar la lengua e qe ne incorajen la trasmission dei adults ai fiœi.
La finalitaa specifega de Far Lombard l’è realizar e divulgar dei scriits de interess editorial e dei audio-video in lengua lombarda, esclusivament per mez de l’ortografia polinomeg-local Scriver Lombard (SL).
Per quell qe al varda i cerne ortografege, l’Associazion la g’ha per referiments domà el test (L. Brasca, 2011-2015, ed. Menaresta) e 'l dizionari ind linia dizionari.lombard.
La lengua lombarda
La lengua lombarda l’è classifegada de l’UNESCO intra i lengue in pericol, cond el codex ISO 639-3 lmo.
Conforma a un aproç ‘polinomeg’, cond lengua lombarda l’Associazion l’intend l’insema dei varietaa locai romanze storegament parlade in tute i province aministrative de la rejon Lombardia, ind la totalitaa del territori aministrativ dei province de Novara e VCO, ind un quai comun de la provinça de Lissandria e del Garda verones, ind la totalitaa del canton Texin in Svizera, ind i vall Grixone del piovent meridional alpin in Svizera, e ind el Trentin ocidental. Intra i varietaa de la lengua lombarda elencade qì de sora e destinatarie de l’interess e ativitaa de l’Associazion, g’è incluse i insì-ciamade “varietaa de transizion in vers ai lengue confinant”, parlade ind una quai localitaa de confin a l’interna de l’area definida qì de sora.
Far Lombard la promœv ogni varietaa oral local del lombard, del moment qe çascuna a l’è espression istessament importanta de la lengua lombarda.
