Cossa l'è
La grafia Scriver Lombard (breviada come SL) l'è una grafia polinomega per la lengua lombarda.
Nassida de l'idea del lenguista Lissander Brasca ind i prim agn del terz millene, la SL la fonda i so raix ind i tradizion plu vegie de la lengua, e l'è spiegada in detai ind el , publegad ind la so prima edizion ind el dexember del 2011.
La SL la ciapa l'ispirazion ind la tradizion leteraria lombarda plu antiga, çoè medieval: Vivald Belcalcer, Bonvexin de la Riva, Uguçon da Lod, ecetera.
Obietiv
La grafia SL la g'ha la mira de crear una koinè ortografega per tuts i idioma lombards.
La vœl vesser, çoè, una manera de scriver ol lombard parzialment uniforma per tuts i lombardofon, senza qe vergun al g'habie de pensar ind un dialet divers del so.
Parzialment uniforma perqè i resta dei diferenze picene intra i diverse variant, qe però i è minimizade per dar miga dei problema ind la comprension soverprovinçal.
Perqè ?
Come ogne lengua "dialetizada", overa discriminada, sbiotida de la so storia sociolenguistega, e per donzene d'agn segregada a lengua principalment parlada, ol lombard incœ al g'ha miga un sistema ortografeg standard.
I grafie plussee dovrade, desvilupade a la fin del 1800 e basade in sul sistema grafeg de l'italian (con la jonta dei letere ü e ö), i è miga adate a'l sistema lenguisteg lombard, e qest al rend plussee grama la comunegazion soverprovinçal. Infina ol milanes classeg, forse l'uneg sistema lombard cond una certa tradizion storega, al se presta miga a tute i variant lombarde, e al g'ha ol desvantaj de vesser stait desvilupad in subordinazion a'l sistema toscan e donca l'è miga rispetos de la morfo-fonolojia idiosincratega dei variant lombarde. L'è per qests motiv qé qe l'è nassid ol projet Scriver Lombard.